Vavek reču da se : „Prvi mačići va vodu hitaju“ ... ma nas se ni dalo obezhrabrit ... pa je nas devet krenulo puno voje va školu planinarenja va organizacije našega i vašega PD VIŠKOVO. Moramo spomenut da škola ni orijentirana samo na člani PD Viškovo već istu moru prijavit i člani drugeh planinarskeh društva (k'o ča je bil slučaj va naše klase – 1. klase PD Viškova, ča nas je posebno razveselilo).
Koliko god smo misleli da ćemo se to obavit bez problema i na brzinu, stvarnost je vavek drugačja i ponovo se potvrdilo da plan i realizacija fanj puti znaju bit posvajeni...
Nismo ni krenuli va školu va trećen mesece 2020. leta, onako si ozareni i nadobudni: s novemi tekami, lapiši i parićanemi marendami za vele i miće pauze 😊, a već su nan prolongirali predavanja aš je korona kucala na vrata ... niš od diplome prvi put ... pa smo ponovo krenuli od početka - na jesen (va setembre 2020. leta) nadajuć se da ćemo to sad obavit kako rabi ... i se je teklo glatko dok nismo morali odelat sam kraj - kad smo ponovo fermali aš nas „epidemiološki uvjeti“ nisu pustili da se podružimo i proslavimo kraj škole i da zgrabimo konačno te diplome ... Tek na proljeće 2021. leta diplome su finile va našeh rukah ... porođajne muke bi se reklo, bi reć da je to po seh prilikah škola ka je durala najduže va povijesti planinarskeh škol ali splatilo se je ... bili smo prvi ki su finili školu va organizacije našega društva, a prvi se pamte ...
Čuda tega smo navadili: od osnovneh pravil da se ruke ne drže va žepeh dok se hodi i sl., i čuda raznorazneh povijesneh podatki (si mi školani sad znamo ča je bilo 1874. leta – a ki drugi to ne zna, neka se potrudi doznat (uguglat ili npr. upisat planinarsku školu) i zač je to jako važno leto za planinarstvo va Hrvatske) pa do jako ozbiljneh stvari kod ča je: planinarska oprema ku rabi koristit, kako se dobro parićat za boravak va prirode (priprema, kretanje, orijentacija) i kako prirodu čuvat, kako vezat špagi, pa se do prve pomoći, i spašavanja va planinah i kako funkcionira HGSS pul nas (predavanje njihovega člana i iskustva s prve ruke su nas se posebno dotaknule).
Najviše od sega nan se (kod i vavek na skupštinah i izleteh 😊) pijažala točka razno, jer nakon dela se to treba dobro zaokružit. Ova grupa veseleh judi dobre voje (devet ponosneh školarci) pokazala se kot jako dobar organizator, s posebnen naglaskon na organizaciju onega „Ča je za pojist i popit?“ . Tako ako se s nami najdete va društve na bilo kakoven izlete, ture ili ekspedicije, ne samo da morete imet vere va nas (aš smo sad puni znanja) već sigurno ne morate imet straha da će van ča prifalet. Ako nan se boravak va prirode morda malo oduži bit ćete sigurno va dobren društve veseleh judi dobre voje ki imaju vavek za podelit s vami kvalitetnu „domaću“ hranu, kolači extra klase i domaće delicije od raznega voća uz dobar izbor raznorazneh pripravki iz vlastite proizvodnje.
I na kraje:
Hvala našemi entuzijasti: Bibe, Matije i Predragu, na trudu i strpljenju ... bez njih naše diplome ne bi imele isti sjaj!
PD VIŠKOVO – 1. klasa 😊 (čitaj Planinarska škola - prva generacija)